საზიზღარი ქალაქი გაქვს. საზიზღარი სახლი გაქვს. მეზობლები - ნარკომანები, გარშემო კი - არეულობა.

მეთხუთმეტე ბინის პატრონი "დიმიტრი ბიძია - უზრდელი და უნახავი ალკოჰოლიკი. მთელ დღეებს ბოთლების აგროვებაში ატარებს, ნაგავში იქექება." არადა, ვის აინტერესებს, რომ ჯერ კიდევ გუშინ მიაბარა მიწას ცოლი, რომელიც მძიმედ ავადმყოფობდა... "ერთი ჩვეულებრივი უსარგებლო მეზობელია, რომელიც მხოლოდ ფურთხის ღირსია".

მეცამეტე ბინის პატრონი "ლევანი - ქურდი, ნარკომანი და ეგოისტი. არ აჭმევს უპატრონო კატებს და მსუბუქი ყოფაქცევის გოგოები სახლში აჰყავს. ნონა ბებიას არ ესალმება, ეწევა, სადარბაზოებში დაძვრება". და ნეტავ, ვინ ხვდება, რომ ამ ბიჭს სიყვარული სჭირდება?.. და ნეტავ, ვინ ფიქრობს იმაზე, რა გამოიარა მან? მას ყოველთვის ატყუებდნენ, მას ყოველთვის ღალატობდნენ. ხუთი წლიდან მშობლების გარეშე იზრდება. ხალხი ყოველთვის ხელს ჰკრავს და ყვირილით იშორებს - "მომშორდი, შე ნარკომანო!" დაიღალა, მაგრამ არ ნებდება. დარჩა იმედი. იმედი იმისა, რომ გამოჩნდება ადამიანი, რომელიც გაუგებს და უშველის. მაგრამ "ვის რაში სჭირდება ასეთი მეზობელი? ყველას მიუფურთხებია, რა მოუვა!"

პირველი ბინის პატრონი "ნიკა - ყოველთვის კარგად ჩაცმულია და მაგარი მანქანაც ჰყავს. ყოველდღე შოპინგებზე დადის, ფულზე სძინავს. მამას გამოღლიტა ის ფული. უბნის ბიჭებს მუშტები ექავებათ, ისე უნდათ მისი ცემა, რადგან სულ დამცინავად იყურება". არადა, ნიკა ამასობაში სამუშაოზე ღამეებს ათევს. სულ გადაავიწყდა პირადი ცხოვრება და კარიერაზეც არ ზრუნავს. თითქოს "ფული და ძალაუფლება აქვს", მაგრამ ამას მისთვის მხოლოდ სიმარტოვე მოაქვს.

მეთოთხმეტე ბინის პატრონი "ანა - მატყუარა, მსუბუქი ყოფაქცევის არარაობა. თმებს წითლად იღებავს. არ მუშაობს, პლანს ეწევა, სახლში კაცები აჰყავს. მის გვერდით ყოფნა - საშინელებაა, ბინაც ძალიან მოუწესრიგებელი აქვს". ყველას მიუფურთხებია, რომ ოცი წლის ანას, უკვე ერთი თვეა კიბო აქვს. დიაგნოზს ვერ გააცურებ. არადა, როგორ სურს ანას, რომ ბედნიერი იყოს და როგორ უნდა, რომ ბოლო თვე თავისუფალი ცხოვრებით გასტანოს.

მეჩვიდმეტე ბინის პატრონი "მიშკა - ბავშვებს აშინებს. როცა ელაპარაკებიან, ეგ თავხედი ყურადღებას არ აქცევს". მიშკას ორი კვირაა პირში ლუკმა არ ჩაუდია. ის ავადმყოფობს. ის დაცარიელდა. ნეტავ რას ფიქრობენ მისი ახლობლები, როცა მის ჩამქრალ მზერას ხედავენ? მიშკა გახდა, სუსტადაა და ყველაფერი სტკივა. "სულელი ბიჭი, რომელსაც თავისი როლი დაავიწყდა და სამოთხე ჯოჯოხეთში გაცვალა". მასზე უკვე მილიონი ჭორი დადის, რაზეც მიშკა მხოლოდ შუბლს ჭმუხნის, არ აქცევს ყურადღებას თავის მწვალებელ ჯალათებს. ის ექიმების დიაგნოზს ელის...

მაგრამ ჩვენ ეს ყველაფერი არ გვაინტერესებს. ჯობია ისევ სხვისი განკითხვა განვაგრძოთ. განვიხილოთ - ნათიას ქცევები, ნიკაზე - ცინიკურად ვიხუმროთ; შევიძულოთ ჩვენს ქვევით მცხოვრები ირინა, მეორე ბინის პატრონი ილია კი - გავაღმერთოთ.
საზიზღარი ქალაქი გაქვს, და შენც, ასეთივე ხარ!