უკვე ბევრისგან გავიგე, რომ აქტიური გოგონები არ მოსწონთ. არსებობს ბიჭების ის კატეგორია, რომელიც გოგოებს ახარისხებს:"დაიკოებად" და საცოლეებად. "დაიკოებად" ჰყავთ "ცუდი გოგონები", რომლებიც მოსწონთ და ძმაკაცებთან მათით მარიაჟობენ. რა თქმა უნდა, ასეთი გოგონები ცოლად არ უნდათ. საცოლე წყნარი, მშვიდი, უთქმელი უნდა იყოს, ისეთი, ზედმეტ ინიაციატივას რომ არ იჩენს. აბა, რამე თუ "მიქარა", ხომ დაეჭვდება მერე ბიჭი?! თუ კი გოგო ინიციატივას გამოიჩენს, ბევრი ბიჭის თავში ჩნდება აზრი, რომ გოგომ არ იცის "თავისი თავის ფასი". ასეთი აქტიური გოგონები ბევრ სხვა გოგონასაც არ მოსწონს, იმავე მიზეზით, რომ მათ "თავისი თავის ფასი" არ იციან. სამაგიეროდ, მათ ჰგონიათ, რომ იციან. ქმნიან ვეებერთელა ბარიერებს, რომელიც უნდა გადალახოს ბიჭმა, უნდა დაიპყროს მისი გული და იცხოვრონ ბედნიერად. ცხადია, ყველა არ არის "აქტიური გოგო" და არც არის საჭირო. რატომ არ იქცევიან გოგონები ისე, როგორც უნდათ და მოსწონთ? მიზეზები ბევრი აქვთ:იმიტომ რომ ეს საქართველოა, რას იტყვის ოჯახი, მეზობელი, ჭორიკანა ბიჭი/გოგო.. არა, განა არ ვიცი და არ მინახავს ჭორიკანა ბიჭები/გოგონები. აი, სულ ახლახანს დასცილდა ქმარი ცოლს ძალიან აბსურდული მიზეზის გამო. არ ვიცი, ეს ამბავია მართალია თუ არა, მაგრამ ეს არც გვჭირდება. საქმე იმაშია, რომ ამ ამბავმა იარა ბევრი. ჯერ ერთ ძმაკაცს მიადგა, მერე მეორეს, მესამეს, მეოთხეს და ა.შ. ბოლოს კი, ვარკეთილიდან საბურთალომდე, ჩემს ყურამდე მოაღწია. ვიცი, რომ ძალიან რთულია, ადამიანს აზროვნება შეუცვალო. თითქოს, კოდივით დევს ჩვენში, რომ ბიჭების მიმართ უფრო ტოლერანტულები უნდა ვიყოთ. ძალიან ვწუხვარ, თუ ვინმეს თავი ნივთი ჰგონია. აბა, სხვა რა უნდა უწოდო იმას, როცა ადამიანთან ჰარმონიული, სასიამოვნო ურთიერთობა გქონდა და დაშორების მერე თავი "ნახმარი", "ნაქონი" გგონია? სულ რომ გარეწარი იყოს შენი პარტნიორი, ხომ იცი, რას აკეთებდი და როგორ?! სამაგიეროდ, ბიჭს არავინ არაფერს უთვლის და მაინც მიყვებიან ცოლად, რადგან "ეს საქართველოა". მე თავს ნივთად, ნეკნად, კისრად ვერ აღვიქვამ. და ბოლოს, იმასაც ვიტყვი, რომ მე ორივე სქესი ძალიან მიყვარს.

პ.ს. ეს "ნაჯღაპნი" უფრო ადრე უნდა დამედო, მაგრამ ვერ მოვახერხე და რადგან ერთ უსაყვარლეს გოგოს დავპირდი, მაინც მოვინდომე, რომ თქვენთვის გამეზიარებინა.
პ.ს.ს.გიყვარდეთ ჩემნაირები! მე პურიტანი არ ვარ!