აშუღებო, მეც მამღერეთ
ბაიათი,
ჩემს დარდებზეც ავატიროთ
ქამანჩა,
მეჩქარება..სანამ მოვა
განთიადი,
ღამის მუზებს გვირგვინები
დავადგათ.

ავიაროთ მთაწმინდაზე
აღმართები,
თეთრი მთვარე გველოდება
დარაჯად,
იქ მგოსნები გავაღვიძოთ
საფლავებში,
სულს ჩავაცვათ ოქროს სიტყვის
ფარაჯა.

წამომყევით,ხმატკბილებო,
აშუღებო,
სანამ ცაზე მზე ცეცხლისფრად
აალდა,
ღამეს ვანდობ დარდიან გულს,
ადუღებულს..
თორემ დილით?
დილით ისევ
"ხაბარდა!"