საბჭოთა კავშირი დაიშალა! იმპერია განადგურდა!
ალბათ ახლა გეღიმება და ფიქრობ რომელ სულელს მოაფიქრდა საბჭოთა კავშირის ერთ-ერთ ყველაზე საშიშ ციხეში ასეთი წერილის გაგზავნა და მითუმეტეს მისთვის ვინც საქართველოში ერთ-ერთ ყველაზე საშიშ ტერორისტად არის შერაცხული და დასახვრეტად ამზადებენ. მაგრამ ამ წერილში იმდენ უცნაურ რამეს გეტყვი ალბათობის თეორიით გიჟად შემრაცხავ. სანამ გიჟის იარლიყს მომაკრავდე ბოლომდე წაიკითხე.
მეც საქართველოში ვცხოვრობ ერთი განსხვავებით ახლა 2016 წელია მე კი წერილს დროის მანქანით 1983 წელში ვაგზავნი. რაც სულ პირველად გითხარი სიმართლეა გეგა, საბჭოთა კავშირი დაიშალა და ახლა სხვა ხელისუფლების მმართველობის ქვეშ ვართ. საქართველო დამოუკიდებელი და დემოკრატიული რესპუბლიკაა (რამდენადაც შეგვიძლია იმდენად დემოკრატიული) ბევრ ისეთ რამეს გეტყვი რაც სახეზე ბედნიერების ღიმილს მოგგვრის, მაგრამ ეცადე ჯალათებმა სიხარული არ შეგატყონ სახეზე. თუ შეამჩნიეს რომ სიკვდილმისჯილ პატიმარს რაღაც ახარებს დაეჭვდებიან და წერილს წაგართმევენ მე კი მინდა რომ ბოლომდე წაიკითხო. თუმცა ისიც კი არ ვიცი მოვიდა თუ არა ჩემი წერილი შენს დრომდე და საკნამდე.
კარჩაკეტილი ოთახიდან გწერ. შენთან წერილის მოწერით კანონებს ვარღვევ და საფრთხეს ვუქმნი დროსა და სივრცეს, მაგრამ მაინც გავბედე შენთვის წერილის მოწერა. ვინაობას ვერ გეტყვი მიუხედავად იმისა რომ საბჭოთა ხელისუფლება აღარ ვრცელდება და აღარც კაგებშნიკები არსებობენ, მაინცდამაინც დიდი თავისუფლებით ვერ დავიკვეხნით. ახლაც არ ვარ დარწმუნებული რომ საკუთარ სახლში ვინმე არ მითვალთვალებს. თუმცა ახალი თაობა მაგალითს თქვენგან, თვითმფრინავის ბიჭებისგან იღებს და ჯერ კიდევ იბრძვის.
საბჭოთა ხელისუფლება რომ დაიშლებოდა თქვენ ყველამ კარგად იცოდით მაგრამ არ მგონია იცოდეთ რომ თვითმფრინავის გამტაცებელი ბიჭები მაგალითი ხართ ჩვენთვის.გვასწავლეთ თუ როგორ ვიბრძოლოთ მაშინაც კი როცა ტირანი ხელისუფლება პირდაპირ ყელში გვიჭერს და გვაიძულებს თავი მის უღელში გავყოთ, როცა ხელისუფლება გვიდგენს ეტიკეტს რა ჩავიცვათ და რა არა, რა დავწეროთ და რა არა ან თუნდაც როგორ გვიყვარდეს და გვძულდეს.
თავიდან როდესაც გავიგე თქვენი გეგმის შესახებ მინდოდა პირდაპირ თქვენთან გადმოვსულიყავი და თითოეულისთვის ჭკუა მესწავლებინა და მეთქვა რომ ამით მარტო თქვენს სიცოცხლეს კი არა ბერი თეოდორეს სიცოცხლესაც გაწირავდით რომელიც სულ არ მჯდარა თვითმფრინავში. მაგრამ მერე გაგიგეთ. გავიგე რომ ძნელია ცხოვრობდე ქვეყანაში სადაც ჯინსის ჩაცმაც კი ხელისუფლებისადმი გამოვლენილ ურჩობად მიიჩნევა და მეც თქვენთან ერთად წამოვედი სიცოცხლის გასარისკად მაგრამ მერე ბედის ბორბალი უკუღმა დატრიალდა...
ვიცი თინას ამბავი და ძალიან ვწუხვარ. მერწმუნე, ძალიან დიდხანს იბრძოდა მაგრამ აკი უკვე გითხარი საბჭოთა კავშირი არავის მისცემს ბედნიერების უფლებას მითუმეტეს თქვენ არ მოგცემდათ ამის უფლებას. უცოდველი ბავშვი ნაადრევად გააგზავნეს, ღმერთთან ზეცაში სადაც იგი ანგელოზად იქცა და ამ ცხოვრების მწარე ტკივილისგან სული არ დაესერა.
არ მინდა სიკვდილის წინ მძიმე ფიქრებით დაგამძიმო მაგრამ ეს უკვე გავაკეთე და ვეღარ შევცვლი. თინაზე ნუ გაბრაზდები, მაშინ იმიტომ არ გამოგეპასუხა რომ ერთდროულად შენც დაგკარგათ და ბავშვიც ამასთან თავისუფლებაც და დიდი ალბათობით სიცოცხლის ხალისიც.
არ გეგონოს რომ თავისუფალ საქართველოს მტრები არ ჰყავს. ვიცი გეგონათ რომ სადაც ჯინსი იყო ბედნიერებაც იქ იყო მაგრამ ცდები, ამერიკაც კი მხოლოდ იმისთვის ‘’გვიმეგობრდება’’ რომ საქართველო უნდა. აი, რუსეთი კი სხვა საქმეა ის ასე მაინც არ პირფერობს და პირდაპირ გვესხმის თავს. ვერ გეტყვი რომ მომწონს იმის წერა თუ რა მძიმე შედეგები მოგვიტანა 2008 წლის რუსეთ-საქართველოს ომმა ამიტომაც ამაზე ფიქრი შენთვის მომინდია, ალბათ წარმოიდგენ მაინც. ნეტავ რუსეთის პრეზიდენტის სახე განახა როცა საუბარი საქართველოზეა მხოლოდ ამიტომ ვუყურებ ხოლმე ტელევიზორს. ერთი დიდი სანახაობაა. ბუნებრივია რომ არ უნდა საქართველოზე საუბარი რადგან ჩვენ მისი პირადი მარცხი ვართ.
ახლა ყველაზე მაგარს გეტყვი, ქვეყანა სავსეა ჯინსებით, ნამდვილი ამერიკული ჯინსებით რომლის შეძენა და ჩაცმა როცა მოგინდება მაშინ შეგიძლია და არა მხოლოდ ჯინსები, კიდევ უამრავი სხვა რამ რაც ამერიკიდან შემოდის.
ალბათ ვინმეს 1983-ში რომ ეთქვა მალე ჯინსების შეძენა პირდაპირ საქართველოში შეგვეძლებაო სამშობლოს ღალატში დასდებდნენ ბრალს და ციხეში ჩააყუდებდნენ, მერე კიდევ რამდენიმე არჩადენილ დანაშაულს მიაკრავდნენ და ხალხს სამუდამოდ დაავიწყებდნენ მის ნათქვამს.
იცი მე თვალს ვადევნებდი შენი საუკეთესო მეგობრის ირაკლი ჩარკვიანის დაკითხვას და როცა რუს გამომძებელს უთხრა ‘’-მე გადავცურავ ზღვას...’’ ის არ ტყუოდა. მან მართლაც გადაცურა ზღვა თავისი სიმღერით და ყველას დაგვიტოვა ნაკვალევი გულში. ირაკლი ჩარკვიანი ჩვენთვის მეფეა. ოჰ, ნეტავ გენახა რუსი გამომძიებლის სახე როცა კანდიდ ჩარკვიანის შვილიშვილს მასთან საუბარი არ ისურვა და თავი ისე მოაჩვენა თითქოს რუსული არ იცოდა. ესეც პროტესტის გამოხატულება იყო. მიხვდა რუსი გამომძიებელი რომ მომავალი თაობა ზუსტად ასეთი დაუმორჩილებელი და მებრძოლი იქნებოდა.ის არც შემცდარა გეგა, ალბათ თქვენ იმაყებდით ჩვენით ისევე, როგორც ჩვენ ვამაყობთ თქვენით.
თავიდან ყველასთან მინდოდა წერილის გაგზავნა მაგრამ ხომ ხვდები რომ ადვილი საქმე არ არის. მინდა ქალბატონ ნათელას მივწერო, შევეცდები გავამხნევო.არ ვიცი რამდენად გამომივა მაგრამ შესაძლოა თინასთანაც გავბედო წერილის მიწერა.
არც კი იცი როგორ მტკივა გული რომ პასუხს ვერ დაველოდები. დამიჯერე, რომ შემეძლოს აუცილებლად გადაგარჩენდი მაგრამ არ შემიძლია, ეს ჩემს ძალებს აღემატება.
გახსოვდეს სიკვდილის წინ ბოლოს გაიღიმე. ისე გაიღიმე რომ თვით ჯალათიც კი მიხვდეს რომ მას დასცინი, რომ ‘’ბოროტების იმპერიას’’ დასცინი. გახსოვდეს საბჭოთა კავშირს ისევე მოეღება ბოლო როგორც სხვა იმპერიებს. მე ამის პირობას გაძლევ.
სიკვდილის წინ ბოლოჯერ შეისუნთქე ჰაერი და მოშორდი ამ ცოდვებისგან დამძიმებულ სამყაროს!