ერთი ბიჭია რა, ლამაზი თვალები და საოცრად თბილი ღიმილი აქვს. მის ერთ მტევანში ჩემი ორივე ხელი ეტევა და ამაზე ორივეს გვეცინება. ჩემი ციცქნა ხარო, ასე მეუბნება.
მგონი ცოტა გიჟია, ყველა წუთს მეუბნება უზომოდ მიყვარხარო.
მეც მაგიჟებს...
ჩემს ციცქნა სახეს თავის ხელებში მოიქცევს და საათობით შეუძლია ასე იჯდეს და სახეგაბადრული მიყუროს.
შეუძლია ღამით დამირეკოს, მკითხოს, ცოლად ხომ აუცილებლად გამომყვებიო და მერე ძილი შეიბრუნოს, ძილისპირულივით ტკბილად ჩაესმის ჩემი - კი.
მიჩემებს კი არა მისაკუთრებს და ამას ისე სხვანაირად აკეთებს, შეუძლებელია გვერდი აუარო და სიამოვნების ტალღამ არ დაგიაროს.
ჰო, ერთი ბიჭია რა, განსაკუთრებული არაფერი, ჩვეულებრივად დადის, ლაპარაკობს, იცინის, სუნთქავს, უბრალოდ მასთან ჩახუტების დროს სამყარო ჩერდება, ჩუმდება და ერთ პატარა კაფსულაში მხოლოდ ჩვენ ვრჩებით.
ჰო, ერთი ბიჭია რა, განსაკუთრებული არაფერი, უბრალოდ სამყაროში საუკეთესო არომატი აქვს და ყველაზე ტკბილი კოცნა იცის. მსოფლიოში ყველაზე განსხვავებულად გამოხატავს თავის სათქმელს, თვალებით მელაპარაკება და მაგიჟებს.
ჰო, ერთი ბიჭია რა, განსაკუთრებული არაფერი, უბრალოდ ჩემი მზე მისი თვალებიდან ამოდის.
ერთი ბიჭია რა, განსაკუთრებული არაფერი, უბრალოდ სიგიჟემდე მიყვარს.