ჩემი ნაცარა, ბაცანცალა, ყურებპარტყუნა,
ჩემი პატარა ონავარი, ბიძას იმედი,
ხან ბუზღუნავ და ხან ბუტიავ, ჩემო დათუნავ,
ვიჩქარე მაგრამ ოცნებამდე ვეღარ მივედი.

გადაღლილი ვარ, თანაც ისე, რომ მეზარება,
რაიმე რთული გონს მოსწყდეს და გამოაშუქოს,
შენი კისკისი დაერთვება სტროფებს ზარებად,
ო, როგორ მინდა, ეგ კისკისი სულ მე მაჩუქო.

აწყდება სიმი ნეტარების გულის გიტარას,
შენკენ გამოსწევს ოცნებების ტრიო წლეული,
მხიარულება.. აწი მე სხვა არა მინდა რა,
ჩემს ყურცქვიტასთან არ მივიდე ოღონდ ძლეული!

მიიმალება ხშირ ბუჩქებში ჩემი ნაცარა,
და რომ აბრაზებს დღეს ბიძიკოს სულაც არ დარდობს,
დიდი ამბავი, დაე ვიყო ერთხელ ცანცარა,
მე შენ გეტყვი და არ გამოჩნდეს ვინმე, მადარდოს.