ისევ მთვრალი ვარ, პოეზია ისევ მეძახის,
ისევ მინდება შენი მკრთალი სახის აღწერა,
გაზაფხულია, იფოთლება ისევ ვენახი,
ისევ მინდება შენზე ფიქრი, შენზე დაწერა.

ხო! შემაზიზღეს შენი თავი, შენზე ფიქრებიც
და შებოჭილი აქვე ვლპები ვერსად გავრბივარ,
მერე რა მოხდა შენ თუ ჩემი აღარ იქნები,
მე შენთვის დავლევ და ისედაც შენთვის მთვრალი ვარ;

მერე რა მოხდა შენ თუ ჩემი აღარ იქნები,
სხვაზე იფიქრებ, გენდომება სხვისი ალერსი,
ისევ დავლევ და ისევ ცრემლებს შევერკინები,
დაიწერება უფრო კარგი შენზე სხვა ლექსი.