მე და შენ ვსაუბრობთ სხვადასხვა ენაზე
და მაინც რამდენი საერთო გვქონია
რაც შეეხება საუბარს რწმენაზე
აქაც გვაქვს საერთო მე ასე მგონია.
ჩემია ისლამი... ვადიდებ მუჰამედს
შენია ქრისტე და ჯვარია სიმბოლო
ვინახავ "რამაზანს" ვუჩივი თუმცა ბედს
ინახავ "მარხვას" და იხსნილებ თვის ბოლოს.
შენია "ფსალმუნი"... ლოცვანი... ბიბლია
ჩემია "ჰადისი" "სურა" და ყურანი
სხვადასხვა რწმენასაც თავისი ხიბლი აქვს
რომ რამე გვანსხვავებს ნუ იტყვის ნურავინ.
რისკია შენს გამო ვეომო ქართველებს
და მაინც წაგიყვან ცხენების ჭენებით
დღეს შენი ღიმილი იარებს ამთელებს
მიმყავხარ სხვა რწმენის... ალლაჰის ხსენებით...
გერჩივნა შენს კართან ღამე რომ მეთია
დავმარცხდი ათასი ომების მნახველი
და ვიცით ორივემ რომ ღმერთი ერთია
უბრალოდ დავარქვით სხვადასხვა სახელი.
მერე რა ვსაუბრობთ სხვადასხვა ენაზე
სხვადასხვა ენებსაც თავისი ხიბლი აქვს
მერე რა თუ კი ვართ სხვადასხვა რწმენაზე
ჩემს ხელში ყურანი შენს ხელში ბიბლია