ლამაზია მოლოდინი.. ო როგორი ლამაზია,
არ ეძახი.. ისიც არ ჩანს.. მონატრება რა ნაზია,
ვინ რა იცის რა შესცოდა ვისთვის ვინ არ საპატიო,
მთავარია დაბრუნება თორემ თუნდაც აპატიო..

გაფრინდება ეს ცხოვრება, ისე მალე დავბერდებით,
ვარდებივით დავჭკნებით და ბულბულივით ავმღერდებით,
ვისაც გვიყვარს, ფანჯარასთან წლების მერეც გავჩერდებით,
ის კი უკვე აღარ მოვა არც ძალით და აღარც ნებით..

როგორ მინდა ახლა ისევ, ტრამალებზე თოვლი იდოს,
ძვირფასი და სასურველი მიღიმოდეს, ჩემთან იყოს,
დაშორებას თუ გვიქადის მზე, წვიმამ არ გადაიღოს,
გასასვლელი ყველა კარი დაიკეტოს, არ გაიღოს...

ვიცი.. ვიცი ამაოა, ყველა თხოვნა და მუდარა,
გარნა ბედნიერებისთვის წარმომგზავნეს ქვეყნად?! არა!
რაც ვაწამე სული ჩემი ლამაზი და ტკბილი კმარა,
დაე ბედნიერი იყოს... მე ვიკვნესო გულში მარად..

დაე მისი კელაპტრები სიხარულით კიაფობდეს,
მისი ბედი ხომალდივით წინ ცხოვრებას მიაპობდეს,
არ მოშლოდეს ის იმედი, რაც ვაჩუქე, მე არ მქონდეს,
თუ დაღუპვა უწერია, ის გადარჩეს.. მე არ ვცხონდე..

დავასვენე მისი სახე ჩემს საყდარში უკვე ხატად,
მადლობა რომ ზეციერმა ასე კარგი დამიხატა,
არ მეწერა ანგელოზის ალბათ ტრფობა, განბჭეს ცადა,
ჩამომაგდეს ჯოჯოხეთში საუკუნოდ დასაფვლადა.

არ არიან ღირსეულნი.. წყვდიადი და სიმარტოვე..
და სურნელი მისეული.. სხვა სულ ყველამ მიმატოვეს,
ვევედრები დაბრუნებას თვალებს სულში დანატოვებს,
რა ვუყო რომ მასთან მინდა და ვერავის ვიახლოვებ?!

ჩაიფერფლა სიყვარული.. ნება ნება მიდის კვდება,
როგორც ვარდი დაკოდილი სისხლი გასდის, ხმება, ჭკნება,
აღარ მოვა.. თუმცა ვიცი, ეგ როდია ჩემი ნება,
ღმერთმა იცის მისი ნახვა გადამექცა დიდ ოცნებად.

მეყვარები.. მეყვარები დაბეჭდულო ჩემო სულო,
ერთადერთო სიცოცხლევ და ერთადერთო სიყვარულო,
წავა დრო და ძლიერ მალე ჩემგან კვალიც არ დარჩება,
მეყვარები მანამ ვიდრე ყველა ვარდი არ დაჭკნება.

ძალიან მომეწონა ლექსი

Didi madloba lazare❤️❤️

როგორი ლამაზიაა ❤️❤️❤️

დიდი მადლობა ჩემო საყვარელო❤️❤️❤️