გუშინ იბიცაში ვიყიდე იახტა,
ალმასის საჭით და სპილენძის აფრებით,
მოდით, დამიწუნეთ ლექსები.. იაფად..
მე რეიტინგებზე არ შეგევაჭრებით..

წუხელ პრემიაზე გავედი ხიშტების,
და მერე სიზმარში ჯვარზეც კი გამაკრეს,
მე ჩემ წილ იესოს ერთგული ვიქნები,
და თქვენ კი რამდენიც გენებოთ, გამაგდეთ..

მკრეხელობს.. უფალს ჰბაძავსო.. სულელი..
მესროლეთ ასფალტი.. კენჭი არ დატოვეთ..
თქვენთვის რომ მოყვასი არ იყოს სულერთი,
ხომ აღარ მომკლავდა მე ეს სიმარტოვე...

მივდივარ ქუჩაში ცოდვილი თავდახრით,
ვიღაც ატეხილი ქველმოქმედს მიახტა,
არ მჯერა ბატონო სიკეთით გადახდის,
აბა, დამიწუნეთ.. ლექსები.. იაფად..

რა ჩემი საქმეა სისხლი და ცრემლები..
გაგიჟდა ჩემს ირგვლივ ნაღები სამყარო,
უღრმესი მადლობა, ძვირფასო სიგიჟევ,
უღრმესი მადლობა ცოდვილო სამყაროვ!

აქ ყველას პროფილი ჰქონია შექსპირის,
მე შანდორ პეტეფი არავის ვუყვარვარ..
სამყარო.. ლუციფერ.. დაგიხვდა შეცვლილი,
დაგიხვდა შეცვლილი და როგორ უგვანად..

შემხედეთ გუშაგთა უძილო თვალებით,
შეხვედრებს.. ველოდი, შენს ხელებს, უპიროვ,
თუ რამე მძიმეა.. ხვედრია მამების,
ტირილი უთვალოდ, უხმოდ და უპიროდ..

ნუ ტირი დედიკო.. შეიშრე ცრემლები..
რა ვუყოთ.. ეს ხალხი რაც მოხვდა მიაწვა..
გიჟი ვარ.. პატარა.. უმანკო ვბერდები..
იცინეთ.. ლექსები.. ლექსები.. იაფად..