მითხარი როგორ ხარ

მითხარი როგორ ხარ,
რა არის ახალი.
კვირაზე მეტია
აღარ მწერ არაფერს.
დაცემულ ანგელოზს
აუტყდა ხარხარი
და ღამეს პირველად
ჩემს მხარზე გაათევს.
მითხარი როგორ ხარ,
რას გრძნობ, ან ფიქრობ რას,
ნათელი აზრები ან არის,
ან არა!
დღეს ალბათ მეასედ
დავარღვევ პირობას
ღამესთან დავრჩები
ცრემლების ამარა.
მითხარი როგორ ხარ,
რა არის ახალი,
ხანდახან სიტყვები
საქმეზე მეტია,
ხანდახან გინდა რომ
არ იყო მართალი,
ზოგჯერ არსებობაც ისე ზედმეტია.
მაგრამ მშიშრები ვართ
ადამიანები...
და მაინც გაკვალულ
ბილიკებს მივყვებით.
გზიდან გადახვევა?
ოჰ, მეტისმეტია!
თავისუფლება?
არაფრის დიდებით!

ლიკა