"იყო და არა იყო რა",
მერე არც იყო რაც იყო.
დრო მუცელს შენით იყორავს.

იყო... და ახლა ნაციხარ
კაცივით დაგდევს იარა.
არც ნაციხარი კაცი ხარ...

იყო... დრომ გადაიარა,
შენც ტკივილს ვეღარ აიტან.
-სასხლეტი არ აქვს იარაღს.

იყო... ქარს მოჰყვა საიდან,
ან რად წავიდა ქარამდე.
მალე გაჰყვები შაითანს.

იყო... ტიროდი არამდენს...
ამინდმა კარი ჩაკეტა
შენ კი ვერ წვდები კარამდე.

იყო... და სასხლეტს აკეთებ,
სული ცალ პეშვში გიგორავს.
ჩურჩულებ წყეულ ბაგეთი:
"იყო და არა იყო რა"...