გული დამიბერდა მგონი,
ყელში მომდგომია ხველა,
შენთან წაგებული ომი
და ეს ნატყვიარი ყველა

ისე არ მიციებს ფილტვებს,
როგორც შენი აქ არყოფნა.
"თურმე მოგონებით ივსებ
იმ მომავალს, რაც არ მოხდა."

გული დამიბერდა მგონი,
რადგან შევეჩვიე წასვლებს.
ყველა დაწერილი ტომი
მინდა ქარის მოსვლას ჰგავდეს,

როცა წვიმს და შუაღამით
ღვინოს სურნელება მათრობს.
დამარწმუნე, თუნდაც წამით,
რომ ჩემსავით არ გედარდოს

შენი ჩემთან აქ არყოფნა,
ყველა წაგებული ომი,
ყველაფერი რაც არ მოხდა...
(გული დაგვიბერდა მგონი.)