და ამ აფორიაქებულ სულს
ერთი ჩააწყნარებს მხოლოდ,
და ამ დამშვიდებულ გულს
ერთი ააჩქარებს მხოლოდ.

ასი გამიტეხავს ამ გულს
ერთი გამიმთელებს მხოლოდ,
ათი გადამივლის ზედ
ერთი შემეშველის მხოლოდ.

ასნი იტირებენ ყალბად
ერთი დამიტირებს მხოლოდ,
სულის კუნჭულში რაც აქვს
იმას გააჟღერებს მხოლოდ.

ერთი მიერთგულებს მარად,
ასნი იტირებენ მხოლოდ,
ცრემლებს ფანტანივით ყრიან
ერთი ნამდვილია მხოლოდ!