უნდა მოვარდე

და მომიტაცო,

მოულოდნელად, თავზარდამცემად;

უნდა გამოჩნდე, გამომეცხადო,

ავაზაკად და ყაჩაღ - დამცემად!

უნდა დამესხა, როგორც მებრძოლი,

ვერა ვიღონო თავის დამცველად;

უნდა ამიღო როგორც ქალაქი,

ოდეს იღებდნენ განსაძარცველად;

უნდა დამიხვდე, შემომიძახო:

მე მოგევლინე შენ განსაცდელად!

ხელს ნუ შემიშლის ვინმე მავანი,

თორემ მზად იყოს გარდასაცვლელად!

შენ კი რა ჩუმად,

წყნარად ჩაივლი,

იძულებულს მხდი მე დასაცდელად;

დრო იწელება, დრო ნელა მიდის,

როგორ ზოზინით,

რა დამქანცველად . . .