ყველა შენს წასვლას უვარსკვლავო ზეცის ფერი აქვს,
თუმცა შენს ღიმილს ის სიძველე არ შერჩენია,
მე რომ მიყვარდა.

ყველა შენს წასვლას წვიმის სუნი, წვიმის სევდა აქვს,
თუმცა ეგ წვიმა ჩემს დარდებთან არაფერია,
ნუ შეადარებ.

ყველა შენს წასვლას, ან არ წასვლას, არაფერი ჰგავს.
თუმცა ეს ზეცა და ეს გზები მრავლის მთქმელია,
აქ რომ არა ხარ.

ყველა შენს წასვლას, მაინც შენთან, შენთან მოვყავარ.
თუმცა შენს სახლთან მოუთმენლად სულ არ მელიან,
სხვა გზით მივდივარ.