ამეკვიატა შენზე ფიქრები

ამეკვიატა შენზე ფიქრები
არ მძინავს, სამის ნახევარია.
ვნებებს დაიცხრობს მთვარესთან ღამე,
სულელი, ნეტა რა უხარია.
ამეკვიატა შენი თითები ,
მინდა გაგიშვა ჩემი ფიქრიდან,
მაგრამ უშენო წამებს
ვითვლი და,
არ მემეტები -
ჩემთვის მინდიხარ.
ვნებადამცხრალი მთვარე მილულავს ნაცრისფერ თვალებს,
და ღამე ისე გაიცრიცება
მზეზე ოცნებით,
ვერც კი მიხვდება,
თავზე როგორ დაათენდება.
მიყვარხარ, სწორედ ამიტომაც
ნუ გაოცდები -
გათავისუფლებ,
არ მოიხედო! სულ წინ იარე!
ჩემზე ფიქრები აღარ გინდა,
აღარ გიხდება.
მე კი ყვავილებს დავიხატავ
ალბათ, იისფერს,
გავიფერადებ მკერდზე იარებს.
თენდება, მაგრამ ახლა ვიძინებ,
დღეს მზე ამოსვლას დააგვიანებს.

ლიკა